12 ноябрь куни Куала-Лумпурда (Малайзия) 2028 йилги Олимпия ўйинлари учун аёллар футбол бўйича Осиё саралаш турнири қуръаси ўтказилди.
Жереб ташлаш якунларига кўра, Ўзбекистон аёллар терма жамоаси А гуруҳига тушди ва у ерда Япония, Австралия ҳамда Хитой Тайбэйи терма жамоалари билан олимпия йўлланмаси учун курашади.

Саралаш турнири 2027 йил 19 апрелдан 4 декабргача ўтказилади. Ҳар бир терма жамоа олтидан ўйин ўтказади: учтаси ўз майдонида ва учтаси сафарда.
Регламентга кўра, ҳар икки гуруҳ ғолиблари 2028 йилда Лос-Анджелесда бўлиб ўтадиган Олимпия ўйинларига тўғридан-тўғри йўлланма олади.
Иккинчи ўринни эгаллаган жамоалар 2028 йил 28 февраль ва 4 мартда плей-оффда учрашади. Бу тўқнашув ғолиби Олимпиадада қатнашиш ҳуқуқи учун қитъалараро саралаш ўйинида Аргентина терма жамоасига қарши ўйнайди.






